مدرستي...بقلم الشاعرة فاطمة البلطجي
"مدرستي"
كانت الدنيا حكايات
نوادر جحا وروايات
وكنا بوقت الفرصة
بس تخلص الحصّة
نحكي لبعض القصّة
وفتّحي يا وردة
وطاقيّة وغُمّيضة
وحامض وحمّيضة
وجدّولة وربّيطة
وقضامي وتفّاحة
ولؤيطة بالساحة
كنا نلعب مبسوطين
ويزأفولنا لو حافظين
ويا ويلن الكسلانين
من أوضة الجرادين
أوضة ما منعرف وينا
ولا شافتها عينينا
بس إدروا ضحكوا علينا
وهيك تعلّمنا وتربّينا
بعضن مات وصار ذكرى
منستفقدلوا لبكرا
بس اليوم شو تغيّر
كتر اللوم وتحيّر
جيل حر يتخيّر
أكلو وشربو والمعشر
رفقاتو ما بتعرف مين
وما عندو خوف من الدين
تيدرس بدّو معلمين
وإن سقط مش مسؤولين
ما هني فلوسن قابضين
وبالواسطة صارو واصلين
والباقي مش لازمين
حتى لو كانو ناجحين
هيك بهالبلد القوانين
لبكرا شو بعد ناطرين
جيل ما بيقرأ ويكتب
بكبسة عالجوجل بيطلب
لا مدرسة بقيت ولا صفوف
ولا الكلمة بتجمع لحروف
والمنهج نصّو محذوف
شو ناطرنا بكرا نشوف
فاطمة البلطجي
لبنان/صيدا
تعليقات
إرسال تعليق