ياحمام الحرم المكي...بقلم الشاعر أيمن الشهابي
ياحمام الحرم المكى ( من شعر العامية المصرية )
=================
يا حمام الحرم المكى
يا طايف ليل ونهار
إدعيلى أزور و ألبى
وتشوف عينى الأنوار
يا حمام الحرم إسقينى
مية زمزم تحينى
عطشان والسكه طويله
ويا بخت اللى هيروينى
يا حمامه خدينى و روحى
قلبى بينده على روحى
هيمانه وهيه هناك
بس إوعى بسرى تبوحى
يا حمامه خدينى و طوفى
فى الكعبه هيهرب خوفى
وف مكه ويوم الوقفه
تنزل دمعتى فى كفوفى
يا حمامه خدينى معاكى
مشتاق والشوق وياكى
من مصر لغاية مكه
طول عمره بيستناكى
حولين الكعبة النور
وحمام داير بيدور
وملايكة تطوف بجناحها
لحد البيت المعمور
ياحمامه انا قلبى معاكى
بيطوف البيت وياكى
روحى على جناحك هايمه
ولحب الله ندهاكى
يارب إوعدنى وأزوره
وتتملى عيونى بنوره
وأرجع وأشتاق من تانى
وأفرح لما ألمح نوره
يا حمام الحرم المكى
يا طايف ليل ونهار
إدعيلى أزور و ألبى
وتشوف عينى الأنوار
****************
أشعار/ ايمن الشهابى
مصر
من ديوان أغانى الحب والالم
تعليقات
إرسال تعليق