الأخلاق.. بقلم/د.علي مسلم عجمي
(( الأخلاق )) للشاعر د. علي مسلم عجمي
--------
النفس ما بتِترَك حسب أشواقها
وبالنصب تجني مالها و أرزاقها
بتعرف الشخص الأصيل. بحكمتو
و هيك الشعوب بتُعرف بأخلاقها
الأخلاق شو حلوة و لذيذة طعمتو
بعِـز و كرامة عاش يللي ذاقها
و مهما يغطيها تا يحمي سمعتو
ساعة الشدِّة بتنكشف أوراقها
الأخلاق نبتة جذورها حد السما
عالتسامح غصنها عاش و نَمـا
و نكهتو عالأرض نشرت طيبها
محبّة و على أوراقها الخير ارتمى
و النجاح لكل أُمِّـة بعمرها
الأخلاق أسسها و علا فيها و سَما
و منشان أخلاقك تا يعلا قدرها
عطيها ببيتك كل إخـلاص و دِمـا
مكارم الأخلاق رب الكائنات
نشَر فيها بكل أسرارو عِظـات
أرسل نبي و مفضلو فوق البشر
يتمم مكارمها بصَفا و أبهى صِفات
و كرّمو بأخلاق في أروع عِـبر
إنك عظيم الخُلُق في هذي الحياة
زِينة الرجال خِلقو المعتبر
ببحر إيامو ان غِـرق مركب نجاة
و إن ماتت الأخلاق عوراق الشجر
عالإنسانية وزِّع شهادة وفاة
و بتشوف سوء الخُلق علأرض انتشر
متل الجراد بياكل زهور و نبات
الشاعر… د.علي مسلم عجمي
لبنان
تعليقات
إرسال تعليق