ستي،أسمهان،....بقلم الشاعر منصور أبو قورة

 ستي .. ( اسمهان).. !!  

كات ستى .. ( اسمهان ) 

أم أبويا .. الله يرحمها ..

ويرحم ( أبويا ) هو كمان 

كات مالية علينا الدار

ليل ونهار ..

فرح .. وهنا .. 

حنين .. وحنان

وسنابل خير .. !!

ولما ماتت ستى .. 

زمااااان ..

زعلت عليها كتير .. !!

كات فاردة جناحها علينا 

جوا .. وبرة الدار

تحت كل جناح ..

كيمان .. زغاليل ..

مكنتش عارفة تطير .. !!

ف الدهليز 

كات نايمة ...

ف حضن ستى ..

على فرش حصير .. !!

وكات فارشة لنا الأرض ...

حنان .. وأمان

وملاية حب .. 

حرير .. ف حرير .. !!

تحكى لنا .. حكايات

بطعم الشربات 

وحاجااااات .. 

بطعم غزل البنات

واحنا ف حجرها ..

قاعدين .. نايمين

ف دروة .. حيط .. !!

زي كام ربطة جرجير

حدوتة ف ديل حدوتة 

زى ماتكون ...

بتلضم خيط .. !!

كنا زى العفاريت 

تطبطب علينا بكام غنواية 

ف درواية وسهراية  

واحنا .. حواليها ...

نتفطط .. تفطيط .. !!

ناكل ف عيش وفطير

وتنده علينا .. 

يا للا ... يا كتاكيت 

علشان اطعمكوا ..

شوية .. حواديت .. !!

نجرى .. ونلعب 

نتشقلب .. ندحلب 

لحجر ستى ..

الشاطر بشطارته ..

وكنا بنتعلم .. منها .. 

حتى ( الزغاريت ) .. !!

وازاى نتعامل ...

ويا ( الهلافيت ) .. !!

بعقل كبير 

ماتت ستى .. وراحت 

أيامنا ... الحلوة ..

ومعاها كام غنوة .. !!

وكام حلم من الجنة

لسه بيجينى ..

ويصحينى

وانا نايم .. !!

أحس بجناحها ...

وحضن براحها

بيغطى كتافى .. !!

فافتكر الحضن الدافى .. !!

واللمة الحلوة

طبل .. ومزامير

أقوم اتزحزح ...

من تحت لحافى .. !!

وابص جمب البيت ..

افتكر الحيط ..

وسنابل الغيط 

وحضن ستى .. 

ومكان قدمى الحافى .. !!

وكام حدوتة ملتوتة ..

تحت جناحها .. 

ف حواصل طير .. !!

وكام ضحكاية .. 

ف  قمراية 

لسه فاكرهم 

وفاكر ستى  .. 

قدم السعد ..

ووش الخير .. !!

كات الله يرحمها ..

ويعلي ف الآخرة ..

مقامها ..

كانت .. جنة 

قلبها مليان .. حنة .. !!

تحني قلوبنا 

كات علينا تتأنى ..

لما .. بنغلط ..

ونشخبط ..

ف الكراريس .. !!

وتفرح .. لما نرسم 

عروسة ف حضن عريس .. !!

و ( فؤادة ) بتحب ف ( عتريس)

وتزعل .. لما نعيط

وتطبطب ( بشويش )

ايدها كات .. زى المرهم 

زى المية من ( الزير ) .. .اا

كلامها .. طعمه فطير .. !!

بالسمنة البلدى

وضحكتها تروى ..

قلب العطشان 

صغير ... ويا كبير .. !!

كات ستى .. مدينة حب 

تكفى .. مليون قلب 

وتطبطب ع الإنسان 

حتى لو كان ...

غلبان ... وفقير ..!!

دولابها كان .. مليان ..

( ملبس ) .. وحنان 

و ( ملبن  )  بتاع زمان .. !!

يكفى كتير .. وكتير

كات ( ستى ) أميرة 

بنت أمير .. !!

الشاعر / منصور أبوقورة