سامحيني....بقلم الشاعر الزجال يسري عثمان
سامحيني
//////
كسرتي قلبي من قبله
كنت باصلي عا القبله
واتمني رضاكي يوم
وبادعي لك انا ف سنه
وادعي في صلاتي دوم
تكوني في طريقي دليل
دمعي فوق خدودي سيل
وكنتي الورد والميه
كاس مليان بحنيه
ونبع حنان وبر امان
وجودك شطي والمرسي
كنتي بالهنا حاسه
بدلتي الضي ضلمه ليه
وحبي اللي باحاجي عليه
مسحتي الوِرد والتسابيح
وسطر الوِد خطفه الريح
هجرتيني وقلبي جريح
___
وقلت اعيش علي الذكري
رفضت الدنيا والفكره
واقول يمكن تهون بكرا
وبكرا مافيش
ياطير طاير خطف قلبي
وساب الريش
ومن يومها وانا فعلا
مش عارف اعيش
___
فلو ممكن تفارقيني
يعود الضي لعيوني
ف سامحيني وداويني
بعادك والله يحييني
ولو تمشي تعود الروح
ياغاليه قلبي كله جروح
ياريت ممكن تسامحيني
وتنسي الدمع اللي ف عيوني
كفايه وداد يبكيني
يرجع لهفي وشجوني
كفايه خلاص
بحق الود والاخلاص
قربك حاسه ضرب رصاص
الطلقه ساكنه في وتيني
يا اغلي الناس
تعليقات
إرسال تعليق