ياريت.. بقلم الشاعر/جمال زكى عينر

 ( يا ريت ) :

يا ريت للدنيا كنت ما جيت

ولا حبيت ولا اتحبيت

ده مهما العمر بيطَوِّل

بيفنى ولو كتير عدِّيت

تعيش العمر تتمنَّى

وتبني في الخيال جنَّة

وقبل ما تيجي تتهنى 

يضيع في ثواني ما اتمنيت

تعمَّر أرض تبنيها

وتفردها وتطويها

 تخرَّج كل ما فيها

وفي الآخر تفوت ما بنيت

يروح منك حبيب عمرك

تسلم للإله امرك

بإيدك إيه ماهو قدرك

ماهوش راجع ومهما بكيت

ومهما تلف مهما تدور

في أرض خضار في صحراء بور

ده آخرتها السكن في قبور

كإن ما رحت كإن ما جيت

يا دنيا عايزه إيه منَّا

سيبينا وابعدي عنَّا

ده عايشين اللي باقيلنا

بنتدارى ف حيطان البيت

ده عايشين اللي باقيلنا

بنتدارى ف حيطان البيت 

          بقلمي الشاعر جمال زكي عينر