شوؤة تعب ..بقلم الشاعر مهدي خليل البزال

أوقات  قطرة  تحت  رمش  العين 

وضغطة  على  جرح  العمر  مرتين

يمكن النقطة تخدِّر  مكانو  للوَجع

بسّ   الدمع  نقّى  مجاري  العين .

أوقات   كلمة   عا   الجرح  مرهم 

تدهَن  على  جرح  الزّمن   تشفيه .

الكلمة الحنونة  بعد حرب  وقهر

الضحكة لو ما بقي غيرها  تكفيه .

أوقات  بدّك   ضوّ  تمشي   تتبعه 

لو كان وبآخر دِني شويّة بَصيص .

بتركض ورا ها النّور حتى تِلحقو

يا ريت عا أرض الوطن تبقى حريص .

من  وقت  ما صار  الردّي   قدّيس 

وصار الكذب والقتل والتّدليس .

كترت مصايب ارضنا وزاد الدّمار 

حمَّلت عا كفّ النعش أجمل عريس .

خواطر مهدي خليل البزال. 

ديوان الملائكة. 

18/2/2023.