حلمي اتسرق.. بقلم الشاعر/د.إبراهيم القماش
حلمي اتسرق
قعدت اكتب من يومين
عن حلم عمري اللي اتسرق
رفض القلم
رفض القلم يكتب كتير
عصلج وتبت في الورق
سميت وقولت ابدأ منين
حسيت طوفان
أحساس غريب
الدمع في عيوني اتخنق
الحلم اصله كان بسيط
حبة اماني كلام عبيط
وعشانها كان قرار سفر
يومها انكسر
قلبي البرئ
ولقتني في همومي غريق
تاهت سنيني في انتظار
والبسمة من وشي اختفت
فرض القلم
فرض القلم لحظة عتاب
زهرة شبابي في اغتراب.
والدنيا بين أربع حيطان
مقفولة ع زوجة وولد
مرت سنين بعد السنين
وحياتنا دي ماليها القلق
وقف القلم
وقف القلم لحظة حداد
لميت دموعي والولاد
وطلبت من رب العباد
يفضها سيرة سفر
ناح القلم
ناح القلم لحظة انين
دور وقال الحلم فين ؟
بيعناه عشان الهدمتين
حبة فلوس راحوا
في يومين
ضاعت سنين عمري هدر
ملعونة يا سكة سفر
حس القلم
حس القلم لحظة خطر
ورجعلى تاني يقول قدر
مكتوب على جبينا اتسطر
وماكانش شئ في المقتدر
ضحك القلم
ضحك القلم لحظة فرح
فكر كتير مني وسرح
غرس سنونه على الورق
كتب امل
وف قلبي كل الخيرطرح
سكت القلم
سكت القلم لحظة رضا
مسح الدموع من عالورق
ولاقيت شعاع من نور برق
وحلمي راجع يتولد
تسنيم بنت اغلي ولد
خامس حفيد في العدد
قل اعوذ برب الفلق
من شر حاسد حسد
اولادي يارب المدد
نور عيوني واحلام بلد
بيعوضوني اللي اتسرق
دكتور ابراهيم القماش
مصر
تعليقات
إرسال تعليق