نافق، ترافق....بقلم الشاعر السيد عطاالله
نافق ترافق
*********
بقلمي✍️السيد عطاالله
يلا فرفط حروف الكلام
واوزن همساتك بانسجام
حبنا النهارده يساوي كام
لو صادق تتحاكم بإعدام
كل حاجة النهارده تتوزن
دا حتى اللي يحبك بتمن
الناس في السر غير العلن
صعب تفرق طيبين و لئام
ذوق كلامك بالنغمات
يلحنوها تبقى أغنيات
نافق تعيش في تبات
تقول الحق تبقى ملام
عاوزينك بس تقول حاضر
تشتهر رغم غياب المشاعر
يقولوا شمال نفذ يا شاطر
إياك تفتكر نفسك أبو عرام
لو بس بتفك الخط
هتبقى إعلامي وخط
تعيش سعيد مزقطط
تلاقي الكل لك خدام
عاوزينك ترقص تطبل
ولو يتقال عليك أهبل
خلي بالك إياك تتكعبل
التطبيل ما يلزمه علام
هيدوك دكتوراه فخريه
في الهجص و الملاغيه
تبقي سفير ثقافة فكريه
وكرنيه بأنك سفير سلام
المؤهلات شوية نفاق
وعامل للضمير إختراق
تسكن مدينة بعد الزقاق
تحج و ما يلزمك إحرام
يقولوا الدكتور راح
يهتفوا لك بالصياح
مشهور مسا وصباح
برئ رغم كل الإجرام
وعجبي ''''''''''''''''كلمات
السيد عطاالله.
تعليقات
إرسال تعليق