شمعة.. بقلم الشاعر/جمال جلالي

 من الشعر الملحون ( الشعبي الجزائري ).

------------------------------------------------

                ** يَا شَمْعـَـــــــــــةْ **

-----------------------------------------------

01 – حَشَمْتَكْ بَالله يَا شَمْعَةْ ما بِيكْ

     ** تْبَاتِـي طُولْ الّلَيْلْ دَمْعَكْ جَرَايَا 

02 – بَكْيَكْ بَكْيِ حْزِينْ لَا حَدْ يْوَاسِيكْ

     ** حَيَرْتِي عُشَـاقْ هْــــدَابَكْ ضَوَايَا

 

03 – اّلسَرْ لِـي فِيكْ يَا شَمْعَةْ يَهْدِيكْ

    ** شُعَرَاء وَشْيُوخْ فِي سَـرَكْ غَنَايَا 

04– حَشَمْتَكْ بَالله يَـا شَمْعَـةْ مَا بِيكْ 

    ** تَضْوِي عَلْى اّلـﭬْلُوبْ وَانْتِ بَكَايَا 

05 – تَبْكِي مَنْ الَفْرَاقْ مَحْبُوبْ مْخَلِيكْ 

     ** وَلَا بَكْـيْ خْلِيـلْ مَــا عَـــادْ هْنَايَا

 

06 – وَلاَّ حَرْ اّلنَـارْ اّلصَهّــدْ لِـي كَاوِيكْ 

     ** جَاوْبِينِـي بَـالله لَا تْزِيــدْ شْقَايَا

 

07 – سَاهَرْ طُولْ الّلَيْلْ وَانَا هَايَمْ فِيكِ 

     ** تَايَهْ بَيْنَ حْرُوفْ هَـايَمْ فِي هْوَايَا 

08 – ﭬَالَتْ لِي يَا شِيخْ سَمَعْنِي مَا بِيكْ 

      ** دَنْـدَنْ دَانِـي دَانْ ﭬَـابَلّـتْ مْرَايَا

09 – لَوْمَا دَمْعِي سَالْ مَانَضْوِيشْ عْلِيكْ 

     ** سَـرْ بْكَايَـــا بَـانْ فَصَـــلْ لَحْكَايَا

10 – اَوْزَنْهَـا بَــوْزَانْ اّلمَلْحُـونْ يْوَاتِيكْ 

     ** سَمَعْنِــي يَـا شِيخْ اَكْتَبْ لُوصَايَا

11 – لَيْلِي رَاهْ طْـوَالْ رَانِي نَرْجَى فِيكْ 

     ** مَا تْخَبِيشْ اّلسَرْ تَعْـــرَفْ مَـا بِيَا

12 – يَا شَمْعَـةْ يَهْدِيكْיִיִ مَانِـي نْشِيخْ عْلِيكْ 

      ** ﭬََـنْـدُوزْ وعَطْشَـانْ لَبْحُورْ اّلغَنَايَا 

13 – لَوْ نَجَمّتْ نْبُوحْ يَا شَمْعَةْ نْحَاكِيكْ

     ** نَحْكِي لَـكْ سْرَارْ مَـا صَبْتْ دْوَايَا

14 – مَـا يَبْقَاشِي سَـرْ مَا نَحْكِيهُو لِيكْ 

     ** لَطْمَتْنِـي لَمْـوَاجْ خَبَيْــتْ شْكَايَا 

15 – اَدْفَنْتُو فِي بِيرْ لَا مَنْ طَلْ عْلِيكْ 

     ** مَتْوَكَــلْ عَّ الله رَبِــــــي مُولَايَا

16 – وَانْتِ يَا شَمْعَةْ مَا عَنْدَكْ مَا بِيكْ 

     ** مَـا هَجْـرَكْ خْلِيلْ لّفْرَاقُــو بَكَايَا

17 – مَـا شْرَبْتِي مَنْ كَاسْ لَغْرَامُ يَدِيكْ         

    ** مَا طْعَنْتِيـشْ بْحُـورْ اّلدَنْيَـا عَيَايَا

18 – اَبْقِي يَا شَمْعَـةْ مَانِيـشْ مْخَلِيكْ 

     ** اَبْقِي يَـا شَمْعَــةْ عْلِينَــــا ضَوَايَا

19 – لَوْمَا دَمْعَكْ مَا نْخَرْبَشْ وَنْوَاسِيكْ

      ** لَوْلَا دَمْعَكْ مَــا تْخَطَتْ لَقْصَايَ

20 – اَضْـوِي يَا شَمْعَـةْ شُعَـارَهَ تَشْتِيكْ

     ** اَضْوِي يَا شَمْعَـةْ بَدْمُوعَكْ جَرَايَا

21 – اَضْوِي يَا شَمْعَةْ وَمَنْ بَكْيِيِ خَلِيكْ 

     ** اَضْـوِي يَا شَمْعَةْ وَنَعْطِيكْ سْمَايَا

22 – جَلَالِـي جَمَــالْ لّلسَامَـــــعْ وْلِيكْ 

     ** فِــي شَهْـرْ اّلثُــوَارْ تَمَـتْ لَحْكَايَا

23 – أَلْفَيْنْ وْعَّشْرِينْ رَاهْ مْتَـوْرَخْ بِيكْ

      ** خَطَيْتُـو بَحْـرُوفْ وَانْتِ ضَوَايَا

                                                                                              

    نسر الصحراء: جلالي جمال يوم 2020/11/15