عامل عنتر.. بقلم الشاعر/هشام علي
قاعد جنبي شاب وأسمر
عامل نفسه بيشرب شاي
بص عليَّ وقال أنا عنتر
ماشي يتغندر رايح جاي
عيب يا سي عنتر
عيب تتأمّر
دانا م الحارة .. ومش هاي هاي
وبلاش تفضل رايح جاي
إيه إللي رماك على النحيادي
أصلي أنا يابني بنت أصول
ليَّ طريقة عشان تعاملني
وتكلّمني في المعقول
مش بالهيصة .. يا دي الحوسة
جاي عندنا تعمل شملول
روح يا سي عنتر
قبلة وفّكر
وخلّي ما بينّا الخيط موصول
دانا م الحارة مش هاي هاي
ف بلاش تفضل رايح جاي
داخل ليه م السكة العوجة
عامل نفسك راكب موجة
لابس سلسلة أدّ دماغك
كل الناس حوالينا شايفاك
قوم وإتحّرك .. يكفينا شرّك
فاكر إنّ الناس حباك
طب على إيه .. دانا متابعاك
روح يا سي عنتر
عيب تتمنّظر
دانا م الحارة .. ومش هاي هاي
وبلاش تفضل رايح جاي
حد وصف لك النحيادي
دي الناس هنا على أدّ الحال
وإن الدنيا معانا أهي عادي
نجري وراك وف أي مجال
لأ يا حبيبنا دي مش سكتنا
أهلاً بيك لو في المنطال
تعمل عنتر .. وكمان تتمنظًر
روح لطريقك مش ناقصاك
روح بقى يا بني .. دانا م الحارة
مش هاي هاي
وبلاش تفضل رايح جاي
............................................
المهندسين في ١٤/ ٩ / ٢٠٢٢م
عامل عنتر
تأليفي : هشام علي
............................................
تعليقات
إرسال تعليق